أحجاجك اللي منعقد ضيق فله

صرنا نتكلم مع بعض بالدقايق
والا قبل ..؟ ناخذ من الليل كله

كنا نمد من الخيال الحقايق
ما نعرف اش تعني الحياة الممله ..؟

كانت سوالفنا لها البال رايق
ما ننتظر من بعضنا أي زله

واليوم أشوفك منت للحال طايق
منت بطبيعي .. داخلك ألف عله

وشفيك صاير تنفعل واتضايق
اللي مضيق خاطرك أنت خله

لو كنت أنا اللي مضايقك بالخلايق
قلها : ( فمان الله ) و دربك تدله

وكانك تحس من بيننا أنسان عايق ..؟
أحساسك أشهد ما صدق معك والله

لو تفتح الخافق وفيه أتهايق ..؟
تشوف زولك ما معه غير ظله

أرتاح كان أنك من الشك ضايق
الدمع لا تسمح لعينك تهله

الحزن ماهو في ملامحك لايق
احجاجك اللي منعقد ضيق فله

قرب وأخذ مني كلام الوثايق
ومن مر قدامك على الدرب قله

أن أنت حلمي بين كل الخلايق
ما غير حبك ساكن القلب والله ..!